അവനും അവളും

അവനും അവളും. അവരെ രണ്ടുപേരെയും എനിക്ക് വളരെ നന്നായി അറിയാം. അവനെയാണോ അവളെയാണോ എനിക്ക് ഏറ്റവും കൂടുതല്‍ നന്നായി അറിയാവുന്നതെന്ന് ചോദിച്ചാല്‍, ഉത്തരമില്ല ആരെയാണെന്ന്. ജനിച്ച നാള്‍ മുതല്‍ ഞാന്‍ കൂടെ കൊണ്ട് നടക്കുന്നതാണു അവനെ. ഇന്നുവരെ ഈ നിമിഷം വരെ നമ്മള്‍ പിരിഞ്ഞിരുന്നിട്ടില്ല. പക്ഷെ അവളെ ഞാന്‍ പരിചയപ്പെട്ടിട്ട് കുറച്ചു നാളുകളെ ആയിട്ടുള്ളൂ. അന്നാണ് അവനും അവളും പരസ്പരം കാണുന്നത്, അവന് അവളെയും അവള്‍ക്ക് അവനെയും ഇഷ്ടമാണെന്ന് പറയുന്നത്. അതിനു ശേഷം അവര്‍ തമ്മില്‍ ഒരുപാട് അടുത്തു. എല്ലാ കാര്യങ്ങളും പരസ്പരം തുറന്നു പറഞ്ഞു. മനസ്സില്‍ വിഷമമോ സന്തോഷമോ എന്തുണ്ടായാലും അവര്‍ പരസ്പരം പങ്കുവച്ചു. അല്പം പോലും പിശുക്ക് അവര്‍ അതില്‍ കാണിച്ചില്ല. കാലക്രമേണ അവര്‍ ഭാര്യാ ഭര്‍ത്താക്കന്മാരായി. അവന്‍ ആരെയെങ്കിലും ഇത്രക്ക് സ്നേഹിച്ചിട്ടുണ്ടോ എന്നെനിക്കറിയില്ല, ഇനി ആരെയെങ്കിലും ഇതിനേക്കാള്‍ കൂടുതല്‍ സ്നേഹിക്കാന്‍ പറ്റുമോ എന്നും എനിക്കറിയില്ല, കാരണം അത്രയ്ക്ക് ഇഷ്ടമാണ് അവന് അവളെ. കേള്‍ക്കുമ്പോള്‍ അതിശയോക്തി തോന്നുമെങ്കിലും സത്യം അതാണ്‌. അവള്‍ക്ക് അവനോടും അങ്ങനെ തന്നെയാണ്.

ഞാന്‍ എന്തിനാണ് അവരെക്കുറിച്ച് എഴുതുന്നതെന്ന് ചോദിച്ചാല്‍ എനിക്കറിയില്ല അതിന്റെ ഉത്തരം. ഈ ലോകത്ത് അവരേക്കാള്‍ കൂടുതല്‍ സ്നേഹത്തോടെ കഴിയുന്ന എത്രയോ ദമ്പതികള്‍ ഉണ്ട്, എന്തുകൊണ്ട് ഞാന്‍ അവരെക്കുറിച്ച് ഒന്നും എഴുതുന്നില്ല? ആര് പറഞ്ഞു എഴുതുന്നില്ലെന്ന്. ഇത് അവര്‍ക്കെല്ലാം വേണ്ടിയുള്ളതാണ്. ഈ ഭൂമിയില്‍ പരസ്പരം സ്നേഹത്തോടെയും വിശ്വാസത്തോടെയും സന്തോഷത്തോടെയും ജീവിക്കുന്ന ഓരോരുത്തര്‍ക്കും വേണ്ടിയാണിത്.

കുറിപ്പ് :- സത്യത്തില്‍ എനിക്ക് വട്ടാണോ?

എന്ന് നിങ്ങളുടെ സ്വന്തം
പനങ്ങോടന്‍