ആനകളുടെ നീരാട്ട് കണ്ടുകൊണ്ടൊരു ബോട്ട് യാത്ര

 "സാധാരണ ബോട്ട് യാത്രയിൽ മൃഗങ്ങളെ ധാരാളമായി കാണാറുണ്ട്, എന്നാൽ ആനകൾ നീന്തി ഒരു കരയിൽ നിന്നും മറുകരയിലേക്ക് പോവുന്നത് വളരെ വിരളമായി മാത്രേ കാണാൻ പറ്റു. അത് നിങ്ങൾക്ക് ഇപ്പൊ കാണാം.. ആരും ബഹളം വയ്ക്കരുത്.. ദേ അങ്ങോട്ട് നോക്കിക്കേ"

ബോട്ടിലെ ജീവനക്കാരൻ ചേട്ടൻ അത് പറഞ്ഞപ്പോൾ ആണ് നമ്മൾ കുറച്ചു ദൂരെയായി ആ കാഴ്ച കണ്ടത്, ഒരു കൂട്ടം ആനകൾ വെള്ളത്തിലൂടെ നീന്തി അപ്പുറത്തെ കരയിലേക്ക് പോവുന്നു. 

തേക്കടി ജലാശയത്തിലൂടെയുള്ള എന്റെ മൂന്നാമത്തെ ബോട്ട് യാത്രയാണ് ഇത്. പക്ഷെ ഇന്നുവരെ ഇങ്ങനെയൊരു കാഴ്ച കണ്ടിട്ടില്ലായിരുന്നു. ഇത്തവണ എന്തുകൊണ്ടും ഭാഗ്യമുള്ള ദിവസമായിരുന്നു. കാരണം ബോട്ടിൽ കേറാൻ വേണ്ടി നിൽക്കുമ്പോൾ തന്നെ അപ്പുറത്തെ കരയിൽ ഏഴോളം ആനകളും കുട്ടിയാനകളും വെള്ളം കുടിക്കാൻ വേണ്ടി വന്നിട്ടുണ്ടായിരുന്നു, കൂടാതെ കാട്ടുപോത്തുകൾ, മ്ലാവുകൾ ഇങ്ങനെ ഒരുപാടു മൃഗങ്ങളെ ബോട്ട് യാത്ര തുടങ്ങുന്നതിനു മുൻപ് തന്നെ കാണാൻ പറ്റി.

തേക്കടി ജലാശയത്തിലൂടെയുള്ള യാത്ര ഒരു പ്രത്യേക അനുഭവമാണ് എല്ലായ്പ്പോഴും സമ്മാനിക്കുന്നത്. എന്റെ ആദ്യത്തെ യാത്ര ഏകദേശം 12 വർഷങ്ങൾക്കു മുൻപായിരുന്നു. രണ്ടാമത്തേത് ഫെബ്രുവരി 2021 ലും മൂന്നാമത്തേത് ഏപ്രിൽ 2021 ലുമാണ്. മൃഗങ്ങളെ കാണാൻ വേണ്ടി കണ്ണും കാതും കൂർപ്പിച്ചു ചുറ്റോടു ചുറ്റും നോക്കി അങ്ങനെ ഇരിക്കും. ജലാശയത്തിൽ ഇഷ്ടംപോലെ മരക്കുറ്റികൾ പൊങ്ങി നിൽപ്പുണ്ട്. അതിലെല്ലാം കുളക്കോഴികൾ കൂടുകൂട്ടിയിട്ടുണ്ട്. നല്ല രസമാണ് അതെല്ലാം കണ്ടുകൊണ്ടു പോവാൻ. നല്ല ഫോട്ടോഗ്രാഫർമാർക്ക് ചാകരയാണ് തേക്കടി ബോട്ട് യാത്ര എല്ലായ്പ്പോഴും സമ്മാനിക്കുന്നത്. ഞാൻ എനിക്കറിയാവുന്ന പോലെ എന്റെ കയ്യിലുള്ള ക്യാമെറ വച്ച് കുറെ ഫോട്ടോയൊക്കെ എടുത്തു സ്വയം അടിപൊളി എന്നൊക്കെ പറഞ്ഞു അങ്ങനെ ഇരുന്നു.

ഇഷ്ടംപോലെ കാട്ടുപോത്തുകളെയും മ്ലാവുകളെയും കണ്ടുകൊണ്ടു പോവുമ്പോളായാണ് എന്റെ മുന്നിൽ ഇരുന്ന ഒരു ചേട്ടൻ ദൂരേയ്ക്ക് ചൂണ്ടി കാണിച്ചുകൊണ്ട് പറഞ്ഞത്, മ്ലാവുകൾ വെള്ളത്തിലൂടെ നീന്തുന്നത് കണ്ടോ എന്ന്. നോക്കിയപ്പോൾ സംഗതി സത്യമാണ്, ഒരു കൂട്ടം മ്ലാവുകൾ അങ്ങ് ദൂരെ വെള്ളത്തിലൂടെ നീന്തി കരയിലേക്ക് കയറുന്നു. ക്യാമറ സൂം ചെയ്തു കുറച്ചു ഫോട്ടോസൊക്കെ എടുത്തു. വീണ്ടും അടിപൊളി ഫോട്ടോസ് എന്ന് ഞാൻ സ്വയം പറഞ്ഞു.

കൊടുംകാടാണ് രണ്ടു വശവും. മരങ്ങൾക്കു പല പല നിറങ്ങളാണ് ഉള്ളത്. ചിലതു നല്ല പച്ച, ചിലതിനു ഇളം മഞ്ഞ, മറ്റു ചിലതിനു ഓറഞ്ച് പോലത്തെ നിറങ്ങൾ. വളരെ മനോഹരമായ കാഴ്ചയാണ് അത്. പല നിറങ്ങളിലുള്ള മരങ്ങൾ അങ്ങനെ ഇടതൂർന്നു വളർന്നു നിൽക്കുന്നത് കാണാൻ. ഈ മരങ്ങളിൽ ഇഷ്ടം പോലെ കരിങ്കുരങ്ങുകൾ ആടിക്കളിക്കുന്നത് കാണാം. ഈ ബോട്ടുകൾ എല്ലാം അവർക്കു നല്ല പരിചയമുള്ളതുപോലെയാണ് അവയുടെ നോട്ടം കണ്ടാൽ തോന്നുന്നത്. കുറച്ചു ദൂരം കൂടി പോയപ്പോൾ ആണ് അത് കണ്ടത്, പന്ത്രണ്ടോളം കാട്ടുപോത്തുകൾ, എണ്ണാൻ പറ്റാത്ത അത്ര മ്ലാവുകളും മാനുകളും കാട്ടുപന്നികളും ഒരുമിച്ചു നിന്ന് വെള്ളം കുടിക്കുന്നു. അനിമൽ പ്ലാനറ്റ് ചാനലിൽ കാണുന്ന പോലത്തെ കാഴ്ച, സൂപ്പർ.

അങ്ങനെ മുന്നോട്ടു പോവുമ്പോൾ ആണ് ആനകൾ നീന്തുന്ന കാഴ്ച കണ്ടത്. ബോട്ട് അടുത്ത് എത്തുമ്പോളേക്കും അവരിൽ കുറെപേർ കരയിൽ കയറിട്ടുണ്ടായിരുന്നു. രണ്ടുമൂന്ന് ആനകൾ അപ്പോളും വെള്ളത്തിൽ കിടന്നു തിമിർത്തു കുളിക്കുവായിരുന്നു. നമ്മുടെ ബോട്ട് അടുത്തുകൂടെ പോയതൊന്നും അവർ മൈൻഡ് ചെയ്തതെ ഇല്ലാ. കരയിൽ കയറിയ ആനകൾ സ്വന്തം ദേഹത്തേക്ക് മണ്ണ് വാരിയിടാൻ തുടങ്ങി. ദേഹം മൊത്തം ചെളിവാരിയിട്ടു കളിക്കുന്നു. നോക്കിയപ്പോൾ കൂട്ടത്തിൽ ഒരു കുട്ടിയാനയും ഉണ്ട്. അതും നല്ലോണം ചെളി വാരിയിടുന്നുണ്ട് ശരീരത്തിലേക്ക്. ഇതെല്ലാം ക്യാമറിൽ ഒപ്പിയെടുക്കാൻ മറന്നില്ല, കൂടെ ഒരു ചെറിയ വീഡിയോയും എടുത്തു. കുറച്ചു ദൂരം കൂടി ചെന്നിട്ടു തിരിഞ്ഞു നോക്കിയപ്പോൾ ആണ് കണ്ടത് ആ ആനകൾ വീണ്ടും വെള്ളത്തിലൂടെ നീന്തി ആദ്യത്തെ കരയിലേക്ക് പോവുന്നു. അടിപൊളി കാഴ്ച.

ഒന്നര മണിക്കൂർ നേരത്തെ ബോട്ട് യാത്ര അവസാനിക്കുമ്പോൾ എന്നെന്നും ഓർത്തിരിക്കാൻ ഒരുപാടു മനോഹര നിമിഷങ്ങൾ കിട്ടിയതിന്റെ സന്തോഷത്തിലായിരുന്നു ഞാനും എന്റെ ഫാമിലിയും. എന്റെ മോളായിരുന്നു ഏറ്റവും കൂടുതൽ എൻജോയ് ചെയ്തത്. ഇനിയും നമുക്ക് പോണമെന്ന് പറഞ്ഞിട്ടുണ്ട് അവൾ. പോവാതെ പറ്റില്ലല്ലോ, അടുത്ത യാത്രയിൽ നമുക്ക് ഇതിനേക്കാൾ മനോഹരമായ എന്തെങ്കിലുമാണ് ഈ കാടും ജലാശയവും ബോട്ടുയാത്രയും നമുക്കുവേണ്ടി ഒരുക്കിയിരിക്കുന്നതെങ്കിലോ?